الجواز.. وثقافة الجزء من كل.

عملت تجربة كده من كم يوم ، ع الفيسبوك وبعدين قعدت أفكر فيها شوية . شيّرت الاقتباس ده :
 "لا تتزوج أبدا يا دوريان، فالرجال يتزوجون حين يقتلهم الملل، والنساء يتزوجن من باب الفضول، ولكنهم جميعا يندمون على ذلك."
 وبعد ما شيّرت الكلام ده اتفاجئت بكمية الشير الكتير جداً للبوست .. كذا حد فرح بيه ، وشيّره مع تعليق او اتنين من بتوع رمي الكلام إياهم ، وتريقة على الجواز والارتباط وما شابه .
 لكن هل الناس اللي شيّرت البوست ده يعرفوا إنه الكلام ده جه في سياق الرواية كـ جزء من كُل ؟ وإنه جه على لسان شخصية من شخصيات الرواية المفروض إنها بترمز للشيطان ؟ وإن المؤلف أساساً أوسكار وايلد كان شاذ ؟ وإن كل ظروف الكلام ده مضادة للفطرة البشرية الطبيعية ؟ أكيد لأ . وده يوصلنا للتالي :

- معظم ثقافة الناس على الفيسبوك متكوّنة بالشكل ده .. ثقافة الـ #جزء_من_كُل ، وبالتالي معظمها ثقافة  مغلوطة مشوّشة ملهاش أساس ، ولا مصادر .

- الناس ضعيفة جداً قدام #رمي_الكلام والتلقيح وخلاص .. مبيقدروش يقاوموا .. للدرجة اللي بتدفعهم إنهم  يشيّروا من كلام أعظم الكتّاب على سبيل بس رمي الكلام .. بشكل فيه كتير من التسطيح .

- #الجواز اه فيه مشاكل كتير خصوصاً في زمننا الحالي .. و#الارتباط بقى يوجع البطن .. كل واحد حرّ في  رأيه .. بس انا لما شيّرت الكلام ده كان عشان انا قاري الرواية ، وبتشارك الجزء ده مع اللي قرأوا الرواية زيي لأنها رواية حلوة ومؤثرة .. إنما أكيد مش عشان أدعو لعدم الجواز ، وأرسّخ فكرة السنجلة الأبدية .. السنجلة حلوة لمرحلة معينة بس .. والجواز بقى مغامرة خطيرة في زمننا الحالي لو مش محسوبة كويس .. بس في الأول وفي الآخر الفطرة البشرية هتجبرك على كده .. لأنه اللي بيعيش ، ويكبر ، ويموت وهو لوحده .. بيزعل .. بجد بيزعل !

تصبحوا على خير